Publikohen pamje të reja, zbulohet pse u kapën mes vete yjet e Tottenhamit

Share Messenger

Përmes disa pamjeve të reja të publikuara në rrjete sociale është zbuluar pikërisht pse portieri i Tottenhamit, Hugo Lloris, dhe Son Heung-min u zunë pas pjesës së parë, gjatë ndeshjes kundër Evertonit të hënën.

Përkundër që Tottenhami ishte në epërsi minimale pas pjesës së parë, Lloris dhe Son u kapën mes vete dhe u desh të ndahen nga Giovani Lo Celso dhe Harry Winks përderisa portieri francez e konfrontoi në mënyrë agresive sulmuesin koreano-jugor.
Dyshja i zgjidhi problemet mes vete pas pjesës së parë, ndërsa Tottenhami arriti ta fitojë ndeshjen me autogolin e shënuar nga Michael Keane në minutën e 24-të, që mbeti e vetmja në këtë ndeshje.

Llorisi e pranoi se ai ishte zemëruar shkaku i mungesës së presionit ndaj kundërshtarëve nga bashkëlojtarët e tij. Pamje të reja të publikuara online tregojnë se cili moment e kishte zemëruar Llorisin.

Ndërsa trajneri Jose Mourinho sugjeroi se mosmarrëveshja kishte lindur shkaku i paraqitjes së dobët të skuadrës.

“Ishte e bukur. Ndoshta ishte pasojë e ndonjërit prej takimeve tona. Nëse dëshironi ta fajësoni dikë për këtë, ai jam unë. Unë isha kritik për djemtë e mi sepse ata, sipas meje, nuk janë mjaftueshëm kritikë për veten dhe njëri-tjetrin”, ka thënë Mourinho.

“Unë u kam kërkuar atyre të jenë vetë më kërkues. U kam kërkuar atyre të kërkojnë më shumë nga njëri-tjetri. Në fund të pjesës së parë e kishim një situatë ku kapiteni mendoi se një djalosh që të gjithë e duan, Sonny, duhet të jepte më shumë nga vetja”.

“Kishte disa fjalë të këqija, s’jam i sigurt nëse e shtynë njëri-tjetrin apo jo, por kjo është një gjë shumë e rëndësishme për skuadrën sepse për t’u rritur si skuadër duhet të kërkosh më shumë nga njëri-tjetri. Duhet të kesh personalitete të mëdha”.

“Isha me të vërtetë i kënaqur. Pas pjesës së parë u thash atyre, kur e patët këtë reagim nuk e pata asnjë dyshim se do të rrinit bashkë deri në fund”.

Share Messenger

Më të lexuarat