Finalistja e Miss Anglisë bëhet e para në historinë e konkursit që konkurron pa grim

Share Messenger

Finalistja e Miss Anglisë është bërë mbretëresha e parë e bukurisë që konkurron pa grim në historinë gati shekullore të konkursit.

Melisa Raouf, një studente kolegji 20-vjeçare nga Londra jugore, parakaloi në gjysmëfinalen e konkursit të hënën pasi zgjodhi një pamje të zhveshur. Tani, ajo do të garojë në finale këtë tetor për kurorën.
“Kjo do të thotë shumë për mua pasi ndjej se shumë vajza të moshave të ndryshme përdorin grim sepse ndihen nën presion për ta bërë këtë”, tha Raouf në një intervistë për gazetën Independent të Mbretërisë së Bashkuar.

“Nëse dikush është i lumtur në lëkurën e tij, ne nuk duhet të detyrohemi të mbulojmë fytyrën me grim. Të metat tona na bëjnë ata që jemi dhe kjo është ajo që e bën çdo individ unik,” shtoi ajo.

Raouf tha se, megjithëse filloi të grimohej në moshë të re, ajo vendosi t’i shmangej traditës për konkursin.

“Nuk kam ndjerë kurrë se i kam përmbushur standardet e bukurisë. Së fundmi kam pranuar që jam e bukur në lëkurën time dhe kjo është arsyeja pse vendosa të konkurroj pa grim”, shpjegoi ajo në intervistë.

Në maj, Raouf postoi një selfie në Instagram nga raundi i “fytyrës së zhveshur” të konkursit, duke shkruar se ajo “po përqafonte njollat ​​dhe papërsosmëritë”.

Angie Beasley, drejtoresha e Miss Anglia, i tha CNN në një deklaratë të premten: “Ne prezantuam raundin e modelit “Bare Face Top Model” në 2019 pasi shumica e konkurrentëve po dërgonin imazhe të modifikuara shumë të veshura me shumë grim dhe ne donim të shihnim personin e vërtetë pas grimit”.

Sipas organizatorëve, Raouf planifikon të dalë sërish me fytyrë pa grim në finalen kombëtare në tetor.

“Ne i urojmë asaj fat të mirë në Miss Anglia, është një gjë shumë e guximshme të bësh kur të gjithë të tjerët janë të grimuar, por ajo po u dërgon një mesazh të rëndësishëm grave të reja”, shtoi Beasley.

Share Messenger

Më të lexuarat