Studenti shqiptar e godet Dick Martyn për akuzat e rreme ndaj UÇK-së

518 Shares Share Messenger

Një nga studentët shqiptar që dje mori pjesë në promovimin e librit të Dick Martyt në Strasburg, ia ka nisur këtë letër Gazetës “Evropa”.

Në këtë letër thuhet se “në librin e promovuar, të paktën një kapitull nuk është shkruar nga Dick Marty, ku autori i vërtetë është Shërbimi Sekret Serb”.

Gazeta “Evropa” e boton pas asnjë ndërhyrje:

I nderuari Z. President,

Përmes kësaj letre po e shpreh hezitimin tim që ka të bëjë me promovimin e librit të Dick Martyt në Strasburg. Shqetësimi im posaçërisht ka të bëjë me kapitullin 19-të të librit në fjalë, ku përsëriten shpifjet e bëra më herët në raportin, e hartuar nga i njëjti autor, i quajtur “Trajtimi çnjerëzor i njerëzve dhe trafikimi i paligjshëm i organeve njerëzore në Kosovë”, raport ky të cilin autori e ka shkruar në cilësinë e Raportuesit të Këshillit të Evropës.

Që nga publikimi i këtij raporti, unë e kam shprehur indinjatën e thellë kundrejt një dokumenti që mban vulën e institucioneve të Evropës, ku në të vërtetë dokumenti nuk ishte asgjë më shumë se një propagandë e ndikuar dhe e ushqyer nga Shërbimi Sekret Serb, në përpjekjet e tyre të vazhdueshme dhe të palodhura për ta njollosur imazhin e Ushtrisë Çlirimtare të Kosovës.

Me mirësjellje më duhet t’jua kujtoj që autoritetet serbe kanë depozituar dosje kundër UÇK-së në Gjykatën Penale Ndërkombëtare për ish-Jugosllavi. Gjatë viteve 1999-2000, të njëjtat pretendime u hetuan nga prokuroria e Tribunalit Penal Ndërkombëtar për ish Jugosllavi.

Më lejoni t’jua kujtoj se e gjithë kjo histori dhe raporti u promovuan nga libri i ish-prokurores së Tribunalit Penal Ndërkombëtar për ish-Jugosllavi, Carla Del Ponte, ku ajo thotë: “Tregimet e të burgosurve të vrarë nga trafikantët e organeve shpesh kthehen në zona konflikti, por shumë rrallë ekzistojnë prova konkrete për të argumentuar tregime të tilla dhe kështu ato tregime përfundojnë si legjenda të thjeshta. ” Unë nuk kam nevojë t’jua kujtoj karakterin e Carla Del Pontes. Pas dorëheqjes së saj të papritur nga Kombet e Bashkuara, ajo pranon se nuk kishte pasur mundësi të ishte e paanshme (pa-paragjykuese), veprim ky që është tejet joprofesional për dikë të kalibrit të saj. Në atë kohë hetimet përfunduan për shkak të mungesës absolute të provave, që nevojiteshin për mbështetjen e pretendimeve të bëra. Unë jam i bindur se hetimet e mëtejshme të iniciuara nga Gjykata Speciale, e themeluar nga autoritetet e Republikës së Kosovës me qëllim të refuzimit të shpifjeve që vijnë nga Beogradi, do të përfundojë në të njëjtën mënyrë.

Kam pasur rastin ta takoj Dick Marty-n në atë kohë kur ai pretendonte se po hetonte pretendimet (akuzat e pabazuara) e mësipërme. Njëjtë si në atë periudhë, unë jam gjithashtu i gatshëm për t’u përballur dhe për të sjellë fakte të panumërta që vërtetojnë se e gjithë historia është e fabrikuar dhe nuk përmban asgjë origjinale dhe nuk ka asnjë thërrim (grimcë) të së vërtetës, dhe kjo në vetvete është zhgënjyese duke pasur parasysh se ai vjen nga një ekip i ngarkuar për ta hetuar të vërtetën dhe jo një trillim që mund të shiste një libër nën emrin e Dick Marty-t.

Të dy Carla Del Ponte dhe Dick Marty përdorën të njëjtat “dëshmi” nga Shërbimi Sekret Serb. Për ta mbështetur pretendimin tim, unë ju bëj thirrje për ta dëgjuar intervistën e fundit të z. Milan Protic, të dhënë për stacionin televiziv të quajtur “TV Happy”, ku ish ambasadori i Serbisë në Zvicër jep dëshmi lidhur me rolin e tij në hartimin e librit për të cilin z. Marty merr autorësinë. Intervista u transmetua në tetor të vitit 2018. Sa për t’ju dhënë një paraqitje të shkurtër të kësaj interviste unë po e citoj z. Protic: “E kam furnizuar Dick Marty-n me 1000 faqe dokumente dhe materiale të përpiluara nga prokuroria dhe shërbimi i inteligjencës serbe”. Ai gjithashtu përmend faktin se të gjitha materialet janë përkthyer në frëngjisht, pasi që Dick Marty kishte refuzuar të komunikonte në ndonjë gjuhë tjetër.

Në librin e promovuar sot, të paktën një kapitull nuk është shkruar nga Dick Marty, ku autori i vërtetë është Shërbimi Sekret Serb.

Me dhimbje të madhe më duhet t’i dënoj në vazhdimësi krimet gjenocidale serbe në vendin tim: mbi 13,000 civilë shqiptarë nga të cilët shumica fëmijë, gra dhe të moshuar u vranë brutalisht; mbi 1 milion shtetas shqiptarë u dëbuan; u përdhunuan mbi 20,000 gra shqiptare, u shkatërruan shumë vende të trashëgimisë shqiptare dhe mijëra shtëpi u dogjën në tërësi. Më thyhet zemra që vazhdimisht kaloj nëpër statistikat e krimeve të pamëshirshme dhe më të tmerrshme, dhe besoj se ato duhet t’i bëjnë thirrje ndërgjegjes së çdo populli. Procedurat gjyqësore po fillojnë në bazë të këtyre shpifjeve, megjithatë unë dhe populli im mbetemi të bindur se e vërteta do të mbizotërojë përsëri.

Dick Marty ishte plotësisht i vetëdijshëm për origjinën e materialeve të tilla dhe ai ishte shqetësuar fare pak në lidhje me kredibilitetin dhe integritetin e burimeve dhe informacionit të tij. Në momentin kur do të dal në dritë e vërteta, Dick Marty duhet t’iu kërkojë falje kosovarëve për prishjen e imazhit dhe dëmit të madh financiar të shkaktuar nga ai, në cilësinë e një hetuesi të besuar të BE-së.

Share Messenger

Më të lexuarat